ALPHA MAAMA (A.M.)

Sapate 5 Me 2019

** LESONI ‘o e TAUKAPO** (From the “Taukapo” Devotional of the Mo‘ui Fo‘ou Fellowship)

Saame 127; Fakaha 5:11-4; Matiu 18:1-14

SAPATE FAKAMË

Sa. 127:3 “Vakai ko e fänau ko e ‘inasi meia Sihova. Ko e totongi ‘oku´ne ‘omi ko e fua he manava.”

‘Oku hoko ma’u pë ‘a e sio ia ki he fänau, ‘oku hangë hatau fakamo’ua’i, ‘o ‘ikai ke hangë ‘a e fänau ko ha koloa ‘oku tau ma’u. Ka ‘oku talamai ‘e he Tohitapu,’ ko e fänau ko ha “tofi’a ia meia Sihova” ko ha me’a’ofa pë ko e pale ke tau fai hono tokanga’i ke fakafuo kinautolu ki he kaha’u´ ‘i he mo’ui faka’Otua ‘ia Kalaisi Sïsü. Pea ‘oku talamai ‘e he ‘apositolo, “‘Oku ‘ikai ko e tu’utu’uni ‘a ho’omou tamai ‘oku ‘i hevani ke mole ha tokotaha ‘i he fanga ki’i sipi´ni.”(Mt.18:14) Ke tauhi ‘a e fänau ‘o hangë ko ha tauhisipi, ‘oku´ne tokanga’i ma’u pë ‘o fekau’aki mo ha taha ‘o e fanga ki’i sipi ‘e mole, ‘oku´ne ‘alu ‘o kumi ki he ngaahi mo’unga ‘a e ki’i sipi. He ko e ‘Otua´ ‘oku´ne tokanga ki he tokotaha mo’ui kotoa pë kuo´Ne hanga ‘o ngaohi mo fakatupu, he ‘oku ‘ikai te Ne finangalo ke ‘auha ha fo’i tokotaha, ka ke a’usia ‘e he taha kotoa pë ‘a e fakatomala. (2 Pita 3:19). Feinga ke ke fetu’utaki mo e fänau ‘oku nau fiema’u ‘a Kalaisi ‘i ‘api´na, ‘i he ako, pea ‘i he siasi, pea ‘i he ngaahi kaungä’api. Pea ke ke hoko ko e fa’ifa’itaki’anga ki he fänau ‘ia Kalaisi ‘i ho’o ngaahi lea, pea ‘i ho’o ngäue ke ke anga’ofa kiate kinautolu. Ko ‘etau tokanga ki he fänau kuopau ke hoa tatau mo e me’a ‘a e ‘Otua ‘oku fai kiate kinautolu, ko honau kau ‘angelo tauhi, ‘oku nau fai honau tokanga’i, pea ‘oku takiekina kinautolu ki he ‘Otua, he ko honau kau ‘angelo tauhi ‘oku nau fakafe’ao ma’u pe ki he ‘Otua. Pea ‘oku pehë ‘enau fiema’u ‘a e fänau, ke tau fai ange ‘a e tokanga tatau kiate kinautolu kae tefito ‘i hono ‘ave kinautolu kia Kalaisi, ke Ne hoko ko honau ‘Eiki mo Fakamo’ui.